Уйăхлăх активлă иртрĕ

 Спорт сывлăха çирĕплетет, ăна упрама пулăшать. Çĕнĕ Пуянкасси шкулĕнче çакна ялан пурнăçласа пыма тăрăшаççĕ.
 Январĕн 23-мĕшĕнчен пуçласа февралĕн  23-мĕшĕччен шкулта оборонăпа спорт массăллă уйăхлăх иртрĕ. Класс ертуçисем ачасемпе сывлăх темипе калаçусем ирттерчĕç. Тĕрлĕ спорт ăмăртăвĕсем, ирсерен зарядка тăвасси йăлана кĕнĕ. Х-ХI классем хушшинче “Брейн-ринг” (вунпĕрмĕшсем çĕнтерчĕç). V-ХI классенче шашкăпа шахмат вăййисем иртрĕç. Çавăн пекех волейбол, мини-футбол турнирĕсем пулчĕç.
 II-VII классенче вĕренекенсем хăйсен шухăшĕсене укерчĕксем урлă сăнларĕç. Вăтаммисем вара харпăр хăй ашшĕ çинчен пĕчĕк сочиненисем çырчĕç. “Атьăр-ха, арçын ачасем!”, “Атьăр-ха, пулас салтаксем!” конкурссем интереслĕ иртрĕç.  Çавăн пекех V-IХ классенче вĕренекенсем вăрçă ветеранĕсене шефа илчĕç. Уроксем хыççăн, пушă вăхăт тупса вĕсене пулăшма çуреççĕ. Çанталăк çилтăманлă пулнă пирки йĕлтĕрçĕсен эстафетине март уйăхне куçартăмăр. Февралĕн 22-мĕшĕнче Тăван çĕршыва хутĕлекенсен кунне халалласа тата Чечняра вилнĕ Çĕнĕ Пуянкасси каччи Алексей Ивановпа Кивĕ Пуянкассинчи Александр Филиппов ячĕпе асăну линейки йĕркелерĕмĕр.
 Чĕннĕ хăнасенчен ĕçпе вăрçă ветеранĕ Петр Зайцев, Алексей Ивановăн кукамăшĕ Акулина Гавриловна тата ял администраци пуçлăхĕ Н.Иванов пулчĕ. Малтан истори учителĕ И.Кондратьев, шкул директорĕ В.Ильин, ял администраци пуçлăхĕ Н.Иванов сăмах илчĕç. Ачасем сăвăсем каларĕç, юрă юрларĕç. “Алеша питĕ лăпкă ачаччĕ. Шкулта лайăх паллăсемпе вĕренчĕ, кил хуçалăхра ялан пулăшатчĕ”,- терĕ А.Ивановăн кукамăшĕ Акулина.
 Александр Филиппов Тăвай шкулĕнче пĕлу илнĕ. Чечняна каиччен район больницинче васкавлă пулăшу уйрăмĕнче ĕçленĕ. Çынпа хăвăрт хутшăнакан сăпай çамрăка пурте хисеплетчĕç. Унăн ашшĕ Кивĕ Пуянкассинчен. Сашăн инкĕшĕ Ирина Владимировна Филиппова куççуль витĕр каласа пачĕ пухăннисене Александр Филиппов пирки. Вилнисене асăнса пурте пĕр минут шăп тăчĕç. Аслă классенче вĕренекенсем палăк умне хыр лăссинчен тунă гирлянда кайса хучĕç. Чечняра пуç хунă çамрăксене халалласа: шкулта ытти командăсене чĕнсе, волейбол турнир ирттертĕмĕр.
 Халĕ шкулта “Милици тата ачасем” акци пырать. Класс сехечĕсем вăхăтĕнче асăннă темăпа калаçусем ирттереççĕ. Шалти ĕçсен пайĕн çул-йĕр куçăмĕн хăрушсăрлăх службин сотрудникĕсемпе тата районти тĕп больница ĕçченĕсемпе тĕл пулма палăртнă.