“Пирĕн ĕçпе ачасем мухтанччăр”, – терĕ ял хуçалăхĕнче тата продукцие тирпейлекен промышленоçра ĕçлекенсен Тăвайри культура çуртĕнче иртнĕ уявĕнче район пуçлăхĕ Н.Иванов. Николай Ильич кăçал тунă çитĕнÿсене кĕскен асăнса хăварнипе пĕрлех умра тата пысăкрах тĕллевсем пулнине палăртрĕ. Çулталăк вĕçленнĕ тĕле пылак çимĕç кăларакан цехăн оборудованине ĕçлеттерме пуçламалла, 2007 çулта Вырăс сали çывăхĕнче ĕне-выльăх комплексĕ тума тытăнмалла, ăратлă пушмак пăрусем, ĕç вăйне перекетлекен çĕнĕ техника туянмалла, çĕр ĕçченĕсен пĕр уйăхри вăтам ĕç укçине ÿстермелле, агропромышленноç комплексне аталантармалли наци проектне пурнăçламалла, акмалли çĕр лаптăкĕсене ÿстермелле тата ытти те.

Район пуçлăхĕ Н.Иванов çавăн пекех пухăннисене халăх пĕрлĕхĕн кунĕпе тата ял хуçалăхĕнче, продукцие тирпейлекен промышленнăçра ĕçлекенсен уявĕсемпе ăшшăн-ăшшăн саламларĕ, малашне те хастар, çирĕп сывлăхлă пулма сунчĕ.

Ун хыççăн сцена çине районти ял хуçалăх управленийĕн начальникĕ В.Ванерке улăхрĕ. Владимир Алексеевич ялсенче пурăнакансен çулталăкра тунă ĕçĕсемпе, ÿсĕмĕсемпе тĕплĕн паллаштарчĕ, тăрăшуллисене ятран асăнчĕ, çитменлĕхсене те палăртрĕ.

Маларахри çулсемпе танлаштарсан, пĕрчĕллĕ тата пăрçа йышши культурăсене, çĕрулмине тата пахчаçимĕçе ял хуçалăхĕнче нумайрах вырăн панă кăçал. Пĕр гектар пуçне вăтамран 16, 7 центнер тĕштырă, 185 центнер çĕрулми, 540 центнер пахчаçимĕç, 15 центнер хăмла илнĕ. “Новый путь”, Ленин ячĕллĕ, “1 Мая”, “Дружба”, “Красная Чувашия” “Шимкусский” ЯХПКсен, “Нива” фермер хуçалăхĕн, “Родник” тулли мар яваплăхлă обществăн кăтартăвĕсем аван.

Кăçал 2744 гектар кĕрхи тырăсем акса хăварнă, 1700 гектар çĕр сухаланă, 2669 тонна вăрлăхлăх тырă хывнă, обществăлла выльăх-чĕрлĕх валли 9200 тонна апат единици хатĕрленĕ. Тата нумай кăтарту илсе кăтартрĕ çапла ял хуçалăх управленийĕн пуçлăхĕ В.Ванерке. Вăл доклад вуланă чухне залра ларакансем районти хуçалăхсен тата “Акконд-агро фирма” обществăн уйĕсенче, фермисенче тунă сăн ÿкерчĕксене мультимедиа проекторĕпе курчĕç. Юлашкинчен уяв ячĕпе саламлама та манмарĕ Владимир Алексеевич. Чăваш правительствин представителĕ В.Тихонов сăмах илчĕ. Владимир Карлович ĕçре хастаррисене – В.Васильева дояркăна "”Красная Чувашия”", И.Семенов комбайнера "Ленин ячĕллĕ", А.Александров механизатора "”Красная Чувашия”" – Хисеп грамотипе парне, республикăри ăратлă выльăхсен выставкине хутшăннă Б.Иванова "Вăрманхĕрри", “Нижаровский” тулли мар яваплăхлă обществăри Г.Осипована дипломпа укçан преми пачĕ.

Чăваш Президенчĕн Указĕпе килĕшÿллĕн, районти хăшпĕр çамрăк çемьесем çав кун пысăк суммăллă сертификатсемлĕ пулчĕç, мăшăрсем ку укçа-тенкĕпе пурнăмалли условисене лайăхлатĕç.

Çакăн хыççăн “Акконд”, тата “Чувашагрокомплект” обществăсен генеральнăй директорĕсен çумĕсем М.Ивановпа А.Иванов сăмах илчĕç, уяв ячĕпе саламларĕç.

Çĕр ĕçĕнче малта пыракансене, выльăх-чĕрлĕх пăхнă, продукцие тирпейленĕ çĕрте палăрнисене Хисеп грамоти тата хаклă парнесем пачĕç район пуçлăхĕ Н.Ивановпа ял хуçалăх управленийĕн начальникĕ В.Ванерке.

Çĕнĕ тырăран пĕçернĕ çавра çăкăра тутанчĕç пурте, ваттисен йăлипе районти хуçалăхсене çулсерен çирĕпленсех пыма ырă сунчĕç çапла.

“Килĕрех, тăвансем, килĕрех. Сирĕнпе кĕреке хитререх”, –тесе уçрĕç концерт программине Тăвайри культура çурчĕн ĕçченĕсем. Райцентрти шкулта вĕренекенсен юрри- ташшисем те уяврисен кăмăлне çĕклерĕç.

Фойере “Ял малашлăхĕ” ятлă кĕнекесен, тĕрлĕ пахчаçимĕçсен выставкисемпе, продукцие тирпейлеме пулăшакан “Тăвайри кооператив” потребобществăн изделийĕсемпе паллашма май пулчĕ.

Уяв программине район администрацийĕн социаллă аталану пайĕн тĕп специалисчĕ Л.Павлова, ял хуçалăх управленийĕн юрисчĕ С.Иванов йĕркелесе пычĕç.