Библиотека яланах ялти халăхшăн культура “вучахĕ” шутланнă. Хальхи вăхăтра информаци технологийĕ вăйланса пынă май, çамрăксем ытларах компьютер патне туртăнаççĕ. Çавах та “кĕнеке – пĕлÿ çăлкуçĕ” текен каларăш хăйĕн вăйне нихăçан та çухатмĕ.

Акă, Тĕмер ял çыннисемшĕн те кĕтнĕ самант çитрĕ. Раштавăн 15-мĕшĕнче кунта тĕслĕх библиотеки савăнăçлă лару-тăрура уçăлчĕ. Чи малтанах ял хутлăхĕн пуçлăхĕ Г.Иванов сăмах илчĕ. Вăл клубра пысăк юсав ĕçĕсем тунине палăртрĕ. Малалла çурта газпа ăшăтма куçасси пирки пĕлтерчĕ. Район администрацийĕн яваплă ĕçченĕсем – Г.Масленников, В.Ильин, И.Петрова, ялсенчи библиотекарьсем тĕмерсене тĕслĕх библиотеки уçăлнă ятпа ăшшăн саламларĕç, парнесем пачĕç.

Г.Иванова библиотекарь вулавăша юсав тума пулăшакансене, уйрăмах Тĕмер шкулĕн коллективне, Т.Зайцева, Е.Катякова ĕç ветеранĕсене, В.Кайсаров предпринимателе пысăк тав сăмахĕ каларĕ. Александрпа Сергей Хумышевсем те тăван ял пурнăçне лайăхлатма хăйсен тÿпине хываççĕ. Пушă алăпа килмен вĕсем ял уявне, компьютер сĕтелĕ парнелерĕç. Библиотекăра электричество системине улăштарма В.Воробьев нумай тăрăшнă.

Ĕçпе вăрçă ветеранĕ П.Ананьев – чи нумай вулакансенчен пĕри. Вăл хăйĕн сăмахĕнче ялти пултарулăх коллективĕн ĕçне çĕнĕрен чĕртсе яма сĕнчĕ.

Уяв ялти шкулти 5 класс ачисем "ертÿçи Л.Кувшинова" хатĕрленĕ литературăпа музыка композицийĕпе вĕçленчĕ.