Иртнĕ çул Пуянкассинчи культура çуртне ял хутлăхĕн вăйĕпе тата культработниксем, çамрăксем тухса ĕçленипе тĕпрен юсанă хыççăн клубăн сăнсăпачĕ кăна мар, ĕçĕ те чылай улшăнчĕ. Çурта газпа хутса ăшăтаççĕ. Кĕркунне çуртăн 2-мĕш хутĕнче тĕслĕх библиотеки уçăлчĕ. Культура çуртне ку чухнехи музыка аппаратури, прожекторсем, мультимеди кинопроекторĕ уйăрса пачĕç. Çакнашкал аппаратура хальлĕхе районта пĕртенпĕрре. Халĕ клубра кашни каç кино кăтартассине йĕркелесе янă. Каникул вăхăтĕнче икшер сеанс та панă. Дисксене тĕслĕх библиотекинчен илетпĕр. Илемлĕ фильмсемпе пĕрлех историлле фильмсем, мультфильмсем те пур. Канашран ку чухнехи интереслĕ кинофильмсем те кÿрсе килетпĕр. Çак кунсенче “Волкодав”, “Жара” фильмсем кăтартма хатĕрленетпĕр. Нумаях пулмасть вăрçă çинчен “Звезда” кăтартнă. Алеша Пугачев газооператор кино кăтартас ĕçе ятарласа кайса вĕренчĕ, лайăх тивĕçтерет. Билет хакĕ те йÿнĕ, 5 тенкĕ кăна.

Кашни шăмат кун клубра дискотека иртет. Унта таврари ялсенчи çамрăксем те çÿреççĕ "Эльпуç, Çĕнçырма, Ураскасси, Тăвайпа Тушкил таранах". Дискотекăна кĕме 10 тенкĕ. Пырса кĕрекен укçапа культура мероприятийĕсем ирттернĕ çĕрте усă куратпăр.