Унта хутшăннă 12 шашист хушшинче тăватă спорт мастерĕ, çичĕ мастер кандидачĕ тата пĕр I разрядлă шашист пулчĕç. Çак ăмăртусене Алексей Егорович 20 çул каялла "ун чухне вăл ял хуçалăх институчĕн студенчĕ пулнă" хăй республика чемпионĕн ятне çĕнсе илнине халалланă. 1987 çулта 22 çулхи Алексей Косарев Шупашкар хулин чемпионатĕнче 2-мĕш вырăн йышăннă та ăна тÿрех республика финалне кĕртнĕ. Республика финалĕнче вăл чемпион ятне чи çамрăкла çĕнсе илни-сенчен пĕри пулса тăнă. Тепĕр 6 çултан çав ÿсĕмрех çак ята Тăрмăш каччи Юрий Владимиров тивĕçнĕ.

Турнира республикăри шашка федерацийĕн председателĕ Михаил Ефимов, Вăрмартан Николай Дмитриев, Вăрнартан Вале-рий Наумов, Ярославльтен Василий Семенов "Тăрмăш" спорт мастерĕсем килнĕ. 10 минутлă регламентпа вылярĕç. Пĕрремĕш туртах шăпа тăрăх В.Семеновпа А.Косаревăн вылямалла килсе тухрĕ. Вăйă нихăшĕ те çĕнтерейменнипе вĕçленчĕ. 10 тур çухатусемсĕр "ничьясене шутламасăр" лидерта пынă Василий Семенов юлашки турта йăнăшрĕ те опытлă мастертан Н.Дмитриевран çухату тÿсрĕ. Эх савăнчĕ те ватă мастер: “Вась-ăна иккĕмĕш хут “Коган хÿтĕлевĕ” çинче çаклатрăм”, – тесе. Çак тĕлпулу мала тухнисене палăртрĕ те ĕнтĕ. Çĕнтерÿçĕ спорт мас-терĕн кандидачĕ Юрий Владимиров пулса тăчĕ. Унăн 9 очко. 8-шар очкопа Н.Дмитриевпа В.Семенов II–III вырăнсем йы-шăнчĕç. Турнира йĕркелекен А.Косаревпа лидерсем сăпайлă, джентльменла пулчĕç, очкосене çурмалла пайларĕç, Алексей Егорович “кĕлентĕр” çакман пĕртен-пĕр шашист пулчĕ.

Пирĕн районтан ăмăртусене А.Афанасьевпа В.Николаев тата А.Шишов кандидатсем хутшăнчĕç. Александр Афанасьев 4, 5 очкопа 8-мĕш вырăн йышăнма пултарчĕ.

Çĕнтерÿçĕсене Алексей Косарев укçан премисем парса хавхалантарчĕ. Кафери апатлану та II ушкăнри инвалид шутĕнченех пулчĕ.

Василий Семенов полковник Ярославльтен яланхиллех пушă алăпа килмен. Вăл çĕнтерÿçĕне хрусталь ваза, Н. Дмитриевпа хăйĕн вĕрентекенне А.Шишова асăнмалăх парнесем пачĕ.

Шашка вăййин пысăк уявĕ районта ăнăçлă иртрĕ. Çакна федераци председателĕ М.Ефимов та палăртрĕ. Шел, хăй вăхăтĕнче районти, республикăри шашка спорчĕн аталанăвне пысăк тÿпе хывнă, район чысне çĕклеме хутшăннă çынна чысланă çĕре рай-он администрацийĕнчен никам та хутшăнмарĕ, çав шутра спортшăн яваплă çынсем те. Республика чемпионĕ кашниех пулаймасть вĕт.