Çамрăксене сывă пурнăç йĕркине хăнăхтарас тесе нумай вăй хурать ЧР финанс министерствин Тăвай районĕнчи пайĕн иккĕмĕш разрядлă аслă специалисчĕ В.Павлов. Виççĕмĕш çул вăл Тăвай ялĕнче 17 çула çитмен ачасен командисем хушшинче мини-футбол турнирĕ ирттерет.

“Спорткомплексра июлĕн 11-мĕшĕнчен пуçласа августăн 6-мĕшĕччен куçса çÿрекен кубока çĕнсе илессишĕн тĕрлĕ урамсенче пурăнакан арçын ачасен 7 ушкăнĕ тупăшрĕ. 32 очко пухса, “Кооператив 1” команда мала тухрĕ. Вăл пĕр вăйă та выляса ямарĕ. Пур командăна та грамотăсемпе, çĕнтерÿçĕне сăран мечĕкпе кубок парса хавхалантарнă. Çак турнира çÿллĕ шайра ирттерме пулăшнăшăн ООО “Дорстрой” директорне В.Румянцева, унти А.Васильев экономиста, И.Степанов предпринимателе, В.Кузнецова тав тăвас килет. Çуллахи каникул вăхăтĕнче ачасемпе çакăн пек спорт ăмăртăвĕсем ирттерни канăва усăллă йĕркелеме, çамрăксене сиенлĕ йăласенчен, право йĕркине пăсассинчен сирме май парать”, – тет Василий Вячеславович.

Вăл хăй те ачаранах спортпа туслашнă. Шкулта вĕреннĕ чухне волейбол, баскетбол, футбол вăййисен ăмăртăвĕсене хутшăннă. “Çиччĕмĕш класра чухне республикăри футбол турнирĕнчен пирĕн Тăвай шкулĕн команди кĕмĕл медальпе таврăнни асăмрах-ха. Ку пысăк çитĕнÿ пулнă маншăн та”, – кăмăллăн пĕлтерет В.Павлов. Хăйне физкультурăпа спорта явăçтарма пулăшнăшăн Иван Григорьевич Степанов тренера ăшшăн тав тăвать.

Канашри финанспа экономика колледжĕнче пĕлÿ илнĕ чухне те Василий ăмăртусенчен айккинче тăман. Халĕ те тăтăшах спортзалра курма пулать ăна. Спорт хăйне май чун апачĕ пекех, сывă пурнăçпа пурăнни пур çĕрте те пулăшса пырать, тет вăл.

“Пĕрлĕхлĕ Раççей” "”Единая Россия”" политика партийĕн ĕçне-хĕлне, тĕллевĕсене çывăха хурса, Василий Павлов 2006 çулта парти ретне тăнă. Мăшăрĕ Лена та пĕлтĕр парти билечĕ илнĕ. Вăл вĕрентÿ пайĕнче бухгалтерта тăрăшать. Сăмах май, Павловсем иртнĕ çул кăна çемье çавăрнă. Нумай ăмăртăва пĕрле хутшăнаççĕ халĕ. Василие футбол вăййи ытларах илĕртет. Вăл районăн пĕрлештернĕ “Янтиково” командинче вылять. Патшалăх влаçĕн органĕсен ĕçченĕсем хушшинче иртекен пĕр ăмăртуран та юлмасть. Зонăри, республикăри вăйăсенче Тăвай ен чысне хÿтĕлет. Июнь уйăхĕнче кăна “Единая Россия” партийĕн регион уйрăмĕ йĕркеленĕ пĕрремĕш спартакиадăра тупăшрĕ. Район администрацийĕнчен О.Ломоносов, В.Шерне, В.Ильин, А.Дмитриев тата ыттисем пултаруллă спортсменсем пулнине палăртрĕ вăл.

Физкультурниксен кунĕпе саламласа çирĕп сывлăх, яланах спортпа утма сунас килет В.Павловпа унăн çамрăк тусĕсене.