Шалти ĕçсен пайĕн пуçлăхĕ Г.Я.Гаврилов право тĕлĕшĕнчи лару-тăрăва тишкернĕ май, малашнехи ĕçри участокри уполномоченнăйсен профилактика ĕçĕпе ытларах вăй хумалли майсем пуласси пирки асăнчĕ.

Районти тĕп больницăн главнăй врачĕ Т.Х.Шакшина сывлăх сыхлавĕнчи лару-тăрупа паллаштарчĕ. Николай Ильич сывлăх учрежденийĕсенче ăшăпа, шывпа, электроэнергипе тивĕçтересси мĕнле пулса пынипе уйрăммăн интересленчĕ, кулленхи тÿлевсемпе татăлса пырассине те тимлĕхе хучĕ.

Ял хуçалăхĕнчи лару-тăрăва тишкернĕ май, урмăш чирĕпе кĕрешессипе малалла та çине тăмалли пирки каларĕç. Кил хуçалăха тилĕ пырса кĕнĕ тĕслĕхсем татах та пулнă. Ветслужба çийĕнчех кирлĕ мерăсем йышăннă. Çавах та ирĕкре çÿрекен йытăсемпе кĕрешмелли ĕç вĕçленмен-ха.

“Коммуналлă хуçалăх ĕçне çĕнетсе улăштарасси, шывпа тивĕçтерессине йĕркелесси, çĕр пайĕсене арендăна парасси – çак ыйтусемпе тăрăшмалли сахал мар”, –палăртрĕ район пуçлăхĕ.

Ку эрнере районта анлă мероприятисем ирттерме пăхнă. Февралĕн 15-мĕшĕнче – район Пухăвĕн депутачĕсен ларăвĕ, çав кунах ял тăрăхĕсенче интернационалист-воинсемпе тĕлпулусем йĕркелеççĕ. Çамрăк суйлавçăсен кунне февралĕн 17-мĕшĕнче кашни ял тăрăхĕнчех ирттереççĕ.