Янтиковский муниципальный округ Чувашской РеспубликиТăвай муниципаллă округӗ
Район администрацийĕн çĕнĕ пуçлăх
Раштав уйăхĕн 14-мĕшĕнче райадминистрацин пĕчĕк залĕнче депутатсен районти Пухăвĕн черетсĕр ларăвĕ пулнă. Ларăва ЧР Патшалăх Канашĕн Председателĕн çумĕ, Патшалăх Канашĕн патшалăх строительствипе вырăнти хăй тытăмлăх комитечĕн председателĕ Г.Г.Васильев, ЧР Президент Администрацийĕн организаципе контроль управленийĕн хăй тытăмлăх органĕсемпе çыхăну тытакан пай консультанчĕ В.В.Михайлов, ял поселенийĕсен, райадминистрацин управленийĕсемпе пайĕсен пуçлăхĕсем, предприятисемпе организацисен, учрежденисен ертÿçисем хутшăннă. Депутатсем кун йĕркине кĕртнĕ 2 ыйтăва пăхса тухнă: район администрацийĕн пуçлăхĕн должноçне йышăнассипе ирттернĕ конкурс результачĕсем çинчен тата район пуçлăхне, депутатсен районти Пухăвĕн председательне район администрацийĕн пуçлăхĕпе контракт çырма сĕнни çинчен.
Кун йĕркинчи пĕрремĕш ыйтупа Г.Г.Васильев тухса калаçнă. Вăл Тăвай район администрацийĕн пуçлăхĕн должноçне йышăнассипе туса хунă конкурс комиссийĕн йышăнăвĕпе паллаштарнă. Конкурсра Шупашкарти тулли мар яваплăхлă “Промышленноçри автоматика хатĕрĕсен инновацийĕсемпе технологийĕсем” общество директорĕ Ю.Е.Васильев пĕр саслăн çĕнтернĕ тесе йышăннă. Депутатсем конкурс комиссийĕн йышăнăвне ырланă, Юрий Егорович Васильева хăйĕн полномочи вăхăчĕ тухиччен район администрацийĕн пуçлăхĕ пулма çирĕплетнĕ. Район пуçлăхĕ Т.Х.Шакшина район администрацийĕн пуçлăхĕпе Ю.Е.Васильевпа контракт çырнă. Çĕнĕ пуçлăха Т.Х.Шакшина, Г.Г.Васильев должноçа йышăннă ятпа саламланă, ĕçре ăнăçусем суннă. Юрий Егорович депутатсене хăйне шаннăшăн тав тунă, пĕр-пĕринпе килĕштерсе ĕçлессе шанни çинчен пĕлтернĕ.
"Ял ĕçченĕ"