Янтиковский муниципальный округ Чувашской РеспубликиТăвай муниципаллă округӗ
Ялсенчи тĕл пулусенче
Тăвай район администрацийĕн пуçлăхĕ Ю.Васильев районти ялсенче пулса, унта пурăнакансемпе малалла тĕл пулса калаçать. Вăл çынсен пурнăçĕпе тĕплĕн паллашма тăрăшать, вĕсен проблемисене сÿтсе явма хутшăнать.
Февралĕн 4-мĕшĕнче çакнашкал тĕл пулусем Вăтаяльпе Кармал ялĕсенче те пулса иртнĕ. Кашни ялĕнчех хăйсен проблемисем, хăйсен ыйтăвĕсем, анчах вĕсене пурне те ялăн хальхипе малашнехи пурнăçĕ пăшăрхантарать.
Йăлана кĕнĕ тăрăх, тĕл пулусем 2010 çулхи итогсене пĕтĕмлетнинчен тата кăçал валли задачăсем палăртнинчен пуçланнă. 2011 çулхи задачăсем конкретлăхпа тата пурнăçлама май пуррипе палăрса тăраççĕ. “Пурте хамăр алăра, ыттисем пулăшасса кĕтсе лармалла мар, хамăрăн çине тăмалла”, – терĕ Ю.Васильев. –Паллах, пурин валли те бюджет укçи çитеймĕ. Çавăнпа ниме майĕсемпе ытларах усă курмалла. Мероприятисене ял поселенийĕн пуçлăхĕсем, ялсенчи активистсем пуçарса, йĕркелесе пымалла. Эпир те вăй çитнĕ таран пулăшăпăр. Паян кунччен пуррине упраса хăварса, лайăххине, кирлине малалла хушса пымалла”.
Ялсене тирпей-илем кĕртесси пĕлтерĕшлĕ ыйту пулнине палăртнă Юрий Егорович. Халăха шывпа тивĕçтерес, каçхине урамсене çутатас, вĕсене йĕркеллĕ тытас, социаллă-культурăллă учрежденисен ĕçĕ, халăха ĕç тупса парасси – çак тата ытти хăш-пĕр ыйтусене Вăтаяльпе Кармал ялĕсенче пурăнакансемпе пĕрле сÿтсе явнă.
Тĕл пулусенче çавăн пекех районти шалти ĕçсен пайĕн начальникĕ В.Обаськин, районти социаллă хÿтлĕх пайĕн начальникĕ Л.Аввакумова, тĕп больницăн тĕп врачĕ Н.Бурдасова, Тĕмер ял поселенийĕн пуçлăхĕ Г.И.Иванов, вырăнти пĕтĕмĕшле практика врач офисĕн врачĕ В.Козлова хутшăннă.
"Ял ĕçченĕ"