Янтиковский муниципальный округ Чувашской РеспубликиТăвай муниципаллă округӗ
Район центрĕнчи спорт уявĕ
Çĕрĕпе вĕçтернĕ çил-тăман та, вичкĕн çил те “Раççей йĕлтĕр йĕрĕ –2011” чупăвăн районти ăмăртăвĕсене ирттерме чăрмантараймарĕ ку хутĕнче. Вĕсем спорткомплекс территорийĕнче пулса иртрĕç. Йĕлтĕрçĕсем кăçал нихçанхинчен йышлăн пухăннă – 900 çын ытла. Вĕсене район администрацийĕн ертÿçи Ю.Васильев саламласа ăнăçу сунчĕ, сывă пурнăç йĕркине суйласа илнĕшĕн тав турĕ. Йĕлтĕр йĕрĕ çине тăнисене çавăн пекех ЧР экономика аталанăвĕпе промышленность тата суту-илÿ министрĕн çумĕ В.Аврелькин саламларĕ.
Пирваях старта VIP чупăва хутшăнакансем – район, администраци подразделенийĕсен, предприятисемпе организацисен, учрежденисен ертÿçисем тухрĕç. Финиша вара Геннадий Андреевич Николаев федеральнăй судья пĕрремĕш çитрĕ. Вăл йĕлтĕрçĕсен ăмăртăвне çуллен хутшăнать, çулĕсене кура мар ялан малтисен йышне кĕрет. Хĕрарăмсем хушшинче Тĕмерти вăтам шкул директорĕ Альбина Александровна Николаева çĕнтерчĕ. Вĕренекенсем хушшинче элпуçсене çитекенсем пулмарĕç. Аслă классенчен çак шкулти Евгений Васильевпа Надежда Гаврилова, 1996 тата унран каярах çуралнисенчен Евгений Максимовпа Ирина Иванова çĕнтерÿçĕсем пулса тăчĕç. 18–39 çулхисен ушкăнĕнче Артем Егоровпа (Нăрваш) Надежда Максимова (социаллă тивĕçтерÿ центрĕ) мала тухнă. 40 çултан аслă йĕлтĕрçĕсен ушкăнĕнче Анатолий Иванов (Элпуç ял поселенийĕ) тата Нина Максимова (Тăрмăш шкулĕ) палăрнă.
Малти вырăнсене йышăннисене пурне те грамотăсемпе парнесем парса хавхалантарнă.
Сăн ÿкерчĕкре: йĕлтĕрçĕсем старта тухас умĕн.
"Ял ĕçченĕ"