Янтиковский муниципальный округ Чувашской РеспубликиТăвай муниципаллă округӗ
Пирваях пурнăçламалли тĕллевсене палăртнă
Депутатсен районти Пухăвĕн черетлĕ ларăвĕнче вырăнти парламентарисем район аталанăвĕшĕн пĕл-терĕшлĕ ыйтусене сÿтсе явса йышăнусем кăларнă. Ку вăл районăн 2011 çулхи бюджетне тепĕр хут пăхса тухни, “Районти çул-йĕр куçăмĕнче хăрушсăрлăха ÿстересси” тĕллевлĕ программăна, депутатсен районти Пухăвĕн 2010 çулхи ноябрĕн 17-мĕшĕнчи 6/6 № йышăнăвне улшăнусем кĕртни, районăн муниципаллă реестрĕнче шута илнĕ пурлăха Тăвай ял поселенине пама палăртнă перечене çирĕплетни, ашшĕ-амăшĕнчен ачисене садике янăшăн илмелли суммăна палăртни тата ытти те. Çавăн пекех районăн экономикипе социаллă пурнăç аталанăвĕн 2011 çулхи задачисене сÿтсе явнă. Ку ыйтупа район администрацийĕн пуçлăхĕн пĕрремĕш çумĕ, АПК аталанăвĕпе экологи пайĕн пуçлăхĕ В.Ванерке, райадминистраци пуçлăхĕн çумĕ, вĕрентÿ тата çамрăксен политикин пайĕн пуçлăхĕ В.Шакров, финанс пайĕн пуçлăхĕ А.Сергеев тухса калаçнă. Район администрацийĕн иртнĕ çулхи ĕçне унăн пуçлăхĕ Ю.Васильев пĕтĕмлетнĕ. Вăлах пирвайхи черетре пурнăçламалли тĕллевсене палăртнă.
Кун йĕркине кĕртнĕ ыйтусене сÿтсе явма депутатсем хастар хутшăннă, сĕнÿсем панă.
Депутатсен районти Пухăвĕн черетлĕ ларăвĕ унта хутшăнакансен йышĕпе те уйрăлса тăнă ку хутĕнче. Унта ял поселенийĕсен пуçлăхĕсемпе райадминистрацин структура подразделенийĕсен ертÿçисене кăна мар, пĕтĕмĕшле пĕлÿ паракан учрежденисенче вĕренекенсене те – “Эпĕ çамрăк, суйлама та, суйланма та пултаратăп” интернет-викторинăра мала тухнисене, ЧР Президенчĕн стипендиачĕсене – йыхравланă. Çамрăксем депутатсен районти Пухăвĕн ĕçĕпе паллашнă. Райадминистраци ертÿçи Ю.Васильев пултарулăх ĕçĕнчи уйрăм ăнтăлушăн стипендиатсене Свидетельствăсем панă. Президент стипендиачĕ, Сочири Олимпиада талисманĕсен конкурсĕнче мала тухнă Сильвия Петрована свидетельствăсăр пуçне Интернетпа тÿлевсĕр усă курмалли Сертификат парса хавхалантарнă. Юрий Егорович çавăн пекех “Эпĕ çамрăк, суйлама та, суйланма та пултаратăп” интернет-викторинăра мала тухнисене саламларĕ, райадминистраци дипломĕпе наградăларĕ. Викторина çĕнтерÿçи Елена Яклашкина интернетпа 1 уйăх тÿлевсĕр усă курмалли Сертификата тивĕçрĕ.
"Ял ĕçченĕ"