Янтиковский муниципальный округ Чувашской РеспубликиТăвай муниципаллă округӗ
Пĕрлĕхлĕ информаци кунĕнче
Юн кун районта пĕрлĕхлĕ информаци кунĕ иртрĕ. Çавна май ял поселенийĕсенче, предприятисемпе организацисенче, ĕç коллективĕсенче, районта пурăнакансемпе тĕл пулусем йĕркеленĕ. Вĕсене республикăри халăха ĕçе вырнаçтаракан патшалăх службин ертÿçин çумĕ М.М.Архипов, ЧР Патшалăх Канашĕн депутачĕ, “Акконд” обществăн генеральнăй директорĕ В.Н. Иванов, “Чувашагрокомплект” обществăн генеральнăй директорĕ Г.Г.Александров, Патшалăх службин Атăл-Вятка академийĕн Шупашкарти филиалĕн директорĕ В.Д.Данилов хутшăннă. Ĕçлĕ ушкăнсенче çавăн пекех райадминистраци, шалти ĕçсен пайĕн, МЧСпа пушар надзорĕн подразделенийĕсен представителĕсем пулнă. Информаторсен ушкăнĕсем Тăвай, Тăрмăш, Элпуç, Йăнтăрчă, Тĕмер ял поселенийĕсене çитсе çаврăннă, “Дорстрой” обществăра, “Тăвай кооперативĕ” потребобществăра, Пенси фончĕн районти управленийĕнче ĕç коллективĕсемпе тĕл пулнă, районта пурăнакансемпе шыв-шуртан сыхланас, пушар хăрушсăрлăхне ÿстерес, ялсен территорийĕсене тасатас, тирпей-илем кÿрес, çурхи уй-хир ĕçĕсене хатĕрленсе ирттерес, усă курмасăр выртакан ял хуçалăх пĕлтерĕшлĕ лаптăксене çĕр çаврăнăшне кĕртес тата ытти ыйтусене сÿтсе явнă. Информаци ушкăнĕсен членĕсем çавăн пекех район администрацийĕнче ĕçлекенсемпе тĕл пулнă, граждансене харпăр хăй ыйтăвĕпе йышăннă. Тĕл пулусен вăхăтĕнче граждансем хускатнă чылай ыйту çине вырăнтах хуравсем панă. Çийĕнчех татса пама çук ыйтусем çине хуравĕсене çывăх вăхăтра адресат патне çырса е шăнкăравласа çитереççĕ.
"Ял ĕçченĕ"