Августăн 11–17-мĕшĕсенче Хусанта шашкăлла выляса информаци технологийĕсен III Кубокне çĕнсе илессишĕн ăмăртусем пулнă. Вĕсем кăçал Тĕнче Кубокĕн тапхăрĕн статусне илме тивĕçнĕ. 11 çĕр-шывран 50 спортсмен хутшăннă турнира: Азербайджанран, Анголăран, Белоруссирен, Израильтен, Казахстанран, Конгоран, Молдавипе Украинăран, Узбекистанран, Раççейрен. Вĕсен хушшинче тĕрлĕ континентра, тĕнчере ят-сум çĕнсе илнисем те пур. Çав шутра Африка чемпионĕ Жерве Муангу (Конго), икĕ хутчен тĕнче, Европа, сакăр хутчен Раççей чемпионĕ пулнă, информаци технологийĕсен II Кубокĕнче çĕнтернĕ, Раççей шашисчĕсен пĕрлештернĕ командин тĕп тренерĕ Владимир Скрабов (Ярославль) тĕнчен вице-чемпионĕ, Европа чемпионĕ тата I Кубок çĕнтерÿçи пулнă, çĕр-шыври рейтинг-листра пĕрремĕш номерпе тăракан Дмитрий Цинман (Хусан, тĕнче шайĕнчи гроссмейстер), 23 çула çитмен çамрăксем хушшинче Европа чемпионĕ Андрей Гнелицкий тата ыттисем. Чăваш Енрен те виççĕн вылянă. Олег Михайловпа Николай Дмитриев мастерсем тата пирĕн ентеш Алексей Косаревпа Г.Константинов (Етĕрне) кандидатсем.

Пурĕ 9 тур пулнă (кашни турта икшер партии). Участникăн спорт мастерĕн кандидатĕнчен кая мар пулмалла. Арçынсен турнирне çавăн пекех 4 хĕр хутшăннă, вĕсенчен пĕри – 19 çулхи Сабринелла Самбиньел. Вăл Архангельскра вĕренет, тинĕс сăнав сооруженийĕсен инженерĕ пулма хатĕрленет.

Турнир Кубокне Д.Цинман çĕнсе илнĕ. 2-мĕш вырăн – М.Горюновăн (С.-Петербург).

Ăмăртусем икĕ программăпа иртнĕ: классика вăййисем (45-шер минут) тата хăвăрт выляссипе (3-шер минут).

Çакă та интереслĕ. Информаци технологийĕн Кубокĕ Хусанта икĕ хутчен çÿллĕ шайра иртнине шута илсе, кăçал ку ăмăртусене тĕнче Кубокĕн тапхăрĕпе танлаштарнă. Кубокра шашистсен пурĕ 6 тапхăр вылямалла. Вĕсенчен тăваттăшĕ (Хусантипе) иртрĕ те ĕнтĕ. 5-мĕшĕ Евпаторире сентябрьте, 6-мĕшĕ теплоход çинче Великобританирен Голландие кайнă вăхăтра пулаççĕ.

Хусанти турнир вăхăтĕнче хăвăрт выляссипе Раççей тата Тĕнче сборнăйĕсем хушшинче матч ирттернĕ. Командăсен вылякансене улăштарма та ирĕк пулнă. 6-мĕш турта 8-мĕш хăма çинче Алексей Косарев Африка чемпионĕпе Жерве Муангупа тĕл пулнă. Микроматч 1:1 шутпа вĕçленнĕ. Африканец вырăсла лайăх пĕлет, вăл МГУра мехматра вĕреннĕ. Раççей командишĕн 17 шашист вылянă, тĕнче командишĕн – 11. Сакăр тĕл пулуран 6-шне Раççей команди, 2-шне – Тĕнче команди выляса илнĕ (75,5:52,5 шутпа Раççей пĕрлештернĕ команди çĕнтернĕ).