Сывлăх министерстви пирус туртас йăлана хирĕçлекен мерăсем йышăнас тĕллевлĕ. Çав йытă çимен япалан хакне 10 хут ÿстерсе пирусçăсен йышне 15 процент чухлĕ чакарма ĕмĕтленеççĕ. Раççейре сывлăша сĕрĕмлессине чакарма пулăшакан концепци кăларнă. Ăна В.Путин премьер алă пуснă. Владимир Владимирович министрсене пирус туртас йăларан хăтăлса ыттисене ырă тĕслĕх кăтартма ыйтнă.

Пирĕн çĕр-шывра пирус чи йÿнни иккен. Лондонра пирус пачкин хакĕ 16 акăлчан фунчĕпе танлашать. “Енчен те пирус хакĕ 300 тенке çитсен, туртакансен йышĕ 10–15 процент чакмалла”, – тесе шухăшлать Мускав хулинчи табак туртнине хирĕçлекен тата киревсĕр йăларан пăрăнма вĕрентекен центрăн тĕп врачĕ О.Кутушев. Врачсем пируса рекламăлама пачах пăрахтарасшăн. Обществăлла вырăнсенче туртассине те чакарасшăн вĕсем. Роспотребнадзор сывлăша тĕтĕмпе вараланине хирĕçлекенсен шухăшне ырлать. Пирус хакне майĕпен ÿстерсе пыма пуçлаççĕ.