Иртнĕ эрнере Шупашкар районĕнчи Карачурта “Чувашское” АУО никĕсĕ çинче ăратлă выльăхсен республикăри куравĕ пулчĕ. Унта пирĕн районти Вăрманхĕрринче пурăнакан Борис Иванов тата “Акконд–агро фирма” АХО выставка-презентацие хутшăнчĕç. Борис Александрович хăйĕн килти хушма хуçалăхĕнче хамăр тăрăхра сайра тĕл пулакан тĕрлĕ кайăксемпе чĕр чунсем ĕрчетнипе палăрса тăрать. Курава вăл ку хутĕнче “Лимонная”, “Серебристая”, “Охотничья”, “Золотистая” ăратри фазансем тата китай бентанки "чăхсем тăратрĕ". Эксперт комиссийĕн "ăна Чулхуларан чĕнсе илнĕ" I тата II степеньлĕ аттестачĕсене тата ЧР ял хуçалăх министерствин дипломĕпе укçан преми илме тивĕçрĕ экзотикăлла кайăк-кĕшĕк ĕрчетекен.

“Акконд–агро” çĕнĕ технологипе усă курса туса илекен продукцирен апат-çимĕç продукчĕсем хатĕрленипе паллаштарчĕ. Вăл хăй туса кăларакан сĕтпе унран хатĕрленĕ продуктсем (сĕт, тăпăрчă, кефир, ряженка, хăйма т.ыт.те), “Акконд” кондитер фабрикин çав сĕтрен хатĕрленĕ конфет изделийĕсене тăратрĕ презентацие.

Курава ăратлă выльăхсем те илсе тухнă. Çапла Грачев хресчен фермер хуçалăхĕ “Приволжское” вĕренÿ хуçалăхĕнчен ăратлă сысна аçисем туянма килĕшÿ тунă.