ЧР ĕç ветеранĕ” ята тивĕçме ирĕк пур граждансен категорийĕсем çинчен” Указ кăçалтан вăя кĕрет. Унпа килĕшÿллĕн пенси çулĕсенчи хĕрарăмсемшĕн – 40 çултан, арçынсемшĕн 45 çултан кая мар ĕç стажĕллĕ 26 пин çын сумлă ят илес ирĕкпе усă курĕ. Çав шутра пирĕн районта пурăнакансем те пур.

Иртнĕ çул вĕçĕнче Тăвай енри малтанхи вунă çын “ЧР ĕç ветеранĕ” хисеплĕ ята илчĕç. ЧР Президенчĕн Администрацийĕн ертÿçин çумĕ М.Архиповпа район администрацийĕн пуçлăхĕ Ю.Васильев Валентина Ивановна Андреевана (Тăрмăш), Николай Александрович Александрова (Тушкил), Ирина Григорьевна Алексеевана, Зоя Егоровна Виноградована, Валентина Аверкиевна Иванована, Ираида Васильевна Иванована, Валентина Мануиловна Масленникована, Николай Трифонович Масленникова (пурте Тăвай), Лидия Ильинична Куклована (Чутей), Елена Николаевна Гаврилована (Чÿкçырми) удостоверени пачĕç.

–Çĕнĕ çул тата Раштав уявĕсен ячĕпе саламлатпăр сире, хаклă ветерансем. Пурнăç никĕсне çирĕплетме, 40–45 çул ĕçлесе, пысăк тÿпе хывнăшăн тав тăватпăр. Çирĕп сывлăхлă, вăрăм ĕмĕрлĕ пулăр, – тесе ырă сунчĕç вĕсем.

Ку лайăх пулăм кăçал малалла тăсăлĕ. “ЧР ĕç ветеранĕ” ята илме районта паянхи куна 160 яхăн çын документсем тăратнă. Вĕсем тĕрĕслев витĕр тухаççĕ.

Сăн ÿкерчĕкре: “ЧР ĕç ветеранĕ” удостоверени панă вăхăтра.

А.НИКИТИНА сăн ÿкерчĕкĕ.