Ял хуçалăхĕнче тавар туса илекенсене, çав шутра харпăр хăй хушма хуçалăхĕ тытакан граждансене тата агропромышленноç комплексĕнчи организацисене продукци туса илме тата реализацилеме тухакан тăкаксен пĕр пайне саплаштарма Чăваш Республикин республика бюджетĕнчен субсидисем памалли правилăсемпе килĕшÿллĕн пирĕн районта 2012 çулхи июнь-июль уйăхĕсенче 1317 харпăр хăй кил хуçалăхĕ 840544 литршăн (илекен субсиди сумми 1260816 тенкĕпе танлашать) тата 11 ял хуçалăх предприятийĕ 950787 литршăн (субсиди сумми 1052749 тенкĕлĕх) документсем тăратнă.

Субсидисене ялта тавар туса илекенсен счечĕсем çине 2012 çулхи сентябрьте куçараççĕ. Субсидисем панă чухне вĕсене илекенсен (харпăр хăй хушма хуçалăхĕ тытакан граждансемсĕр пуçне) кăçалхи апрелĕн 1-мĕшĕ тĕлне ĕнесем пуррине тата вĕсен йышĕ 2012 çулхи январĕн 1-мĕшĕ тĕлне пулнинчен кая маррине шута илнĕ.

Сутлăх сĕт туса илме тата реализацилеме тухакан тăкаксен пайне саплаштарма тивĕçтерекен субсидисене çакăн пек ставкăсемпе палăртнă:

–харпăр хăй хушма хуçалăхĕ тытакан граждансене – сутнă кашни 1 литр сĕтшĕн 1,5 тенкĕ;

–ял хуçалăхĕнче тавар туса илекенсене (харпăр хăй хушма хуçалăхĕ тытакан граждансемсĕр пуçне) тата агропромышленноç комплексĕн организацийĕсене – пысăк сортпа сутнă кашни 1 литр сĕтшĕн 2 тенкĕ, пĕрремĕш сортпа сутнă 1 литр сĕтшĕн 1 тенкĕ.