“Ĕçлеме пуçлакан фермерсене 2012–2014 çулсенчи тапхăрта пулăшасси” тĕллевлĕ программăпа иртнĕ конкурса хутшăнма пирĕн районтан темиçе хресчен фермер хуçалăхĕ заявка панă.

Конкурс комиссийĕ Енĕш Нăрваш ялĕнчи А.Ф.Федоров хресчен фермер хуçалăхне суйласа илнĕ. ХФХ ертÿçи производство базине реконструкцилесе çĕнетме 1 млн. та 100 пин тенкĕлĕх грант илме тивĕç пулнă.

Андрей Федоров хăйĕн фермер хуçалăхне 2011 çулхи октябрьте йĕркеленĕ. Унччен вăл “Красная Чувашия” ЯХПК-ра ĕçленĕ. Кăçал 40 гектар урпа, 10 гектар сĕлĕ акнă тата 50 гектар çĕр улми лартнă. Малашне ака лаптăкĕсене татах ÿстерсе пыма палăртать. Унăн хуçалăхĕнче 6 трактор, 1 комбайн, ытти ял хуçалăх машинисем пур. Ку вăхăт тĕлне 40 гектар çинчи урпана çапса илнĕ, çĕр улми кăларса пухассипе малалла ĕçлеççĕ.

Кăçалхи июньте продукцие упрамалли вырăн тума тытăннă, унăн сметăпа пăхнă хакĕ – 2,2 млн. тенкĕ. 900 пин тенки конкурсра çĕнтерсе илнĕ укçа пулсан, 800 пин тенки – хăйĕн, тепĕр 500 пин тенки – инвестици кредичĕ.