Раççее çуллен Таджикистан, Кăркăсстан, Казахстан урлă 20–25 тонна героинпа опий çитет. Ытларах автомобиль тата чугун çул транспорчĕпе лекет. Ăна сутассипе çĕр-шывра преступниксен йĕркеленнĕ ушкăнĕсем ĕçлеççĕ.

Кăçалхи 1-мĕш çур çулта кăна наркотиксен çаврăнăшне контроллекен федераллă служба вилĕм кÿрекен пысăк каналсен çулне пÿлчĕ. Çавăн чухне 9 тонна наркотикле хатĕрсем, психотроплă япаласем туртса илнĕ, çав шутра 1,8 тонна – опий, 6,7 тонна – каннабис ушкăнĕнчи наркотиксем, 428 кг яхăн – синтетикăлла наркотиксем. Афганистанран Раççее наркотиксем кÿрсе килессине йĕркеленĕшĕн 38 çулхи Сергей Михайлов бизнесмена тăрă шыв çине кăларнă. Ку вăл темиçе патшалăха пырса тивекен преступниксен пĕрлĕхĕ шутланнă. Темиçе çул çав ушкăн Пушкăрт республикин территорийĕнче пин ытла килограмм наркотик сутнă, çав шутран çурри – героин. Наркотик сутса тунă укçана преступниксем ирĕк панă бизнеса хывнă. Сăмахран, Михайлов автосервиспа коммерци предприятийĕсем, “Таксист” футбол клубĕ (Уфара) тытнă. Преступниксен пĕрлĕхĕ йĕркеленнĕ 6 ушкăнран тăнă. Унта 200-тен кая мар çын шутланнă. Пĕрлĕх ертÿçине 15 çула çирĕп режимлă колоние янă, 1 млн. ытла тенкĕ штраф тÿлеттернĕ, пурлăхне 46 млн. тенкĕлĕх конфискациленĕ. Вăтаçĕр Азири республикăсенчен кăна мар, Латинла Америкăран Европăри çĕр-шывсем урлă та – Голланди, Германи, Великобритани, Португали – çитеççĕ Раççее наркотикле хатĕрсем (уйрăмах кокаин). Юлашки 7 çулта Европăра кокаинпа усă куракан наркомансен шучĕ 2 хут ÿснĕ, АПШна хуса çитнĕ (5,2 млн. наркоман).

Пĕр сăмахпа, тĕнчере тем тĕрлĕ наркотикпа та усă кураççĕ. Раççейре марихуана та анлă сарăлнă (3,5 млн. çын усă курать). Тĕнчери наркотиксен çаврăнăшĕ наркомафие çуллен 500–800 млрд. доллар тупăш парать Ахальтен мар наркобаронсем “çăмăл наркотиксене”, туртмалли хутăшсене ирĕклĕн сутмалла тăвасшăн (Сорос финансистах). “Çăмăл наркотик” çук, вĕсем пурте хăйсен хура ĕçне тăваççĕ, пĕвере, пÿресене, хырăмай парĕсене пĕтереççĕ. Наркотиксен çулне татăклăн пÿлмелле, мĕншĕн тесен вĕсем çын пурнăçне татаççĕ, ăна вăхăтсăр çĕре кĕртеççĕ.