РФ Президенчĕн 2012 çулхи утă уйăхĕн 28-мĕшĕнче алă пуснă “Шупашкар хулине никĕсленĕренпе 550 çул тата Чăваш автономи облаçне йĕркеленĕренпе 100 çул çитнине уявласси çинчен” указĕпе килĕшÿллĕн Раççей Правительствин Председателĕ Дмитрий Медведев кăрлачăн 28-мĕшĕнче уяв мероприятин тĕп планне çирĕплетекен хушăва алă пуснă.

2013–2019 çулсенче юбилее хатĕрленме тата ăна ирттерме 14440,11 млн тенкĕ уйăрĕç. Вăл шутра федераци бюджетĕнчен – 3881,36 млн тенкĕ, республикăран – 4821,4 млн тенкĕ, бюджетри мар çăлкуçсенчен – 5737,35 млн тенкĕ. Пĕтĕмĕшпе вара 25 млрд тенкĕ уйăрма палăртнă.

Тĕп ĕçсен планĕнче – ял-хулана тирпей-илем кĕртесси, истори-культура палăкĕсене юсаса çĕнетесси, инфратытăмăн çивĕч ыйтăвĕсене татса парасси, республикăра, унăн тĕп хулинче пурăнакансен пурнăçне лайăхлатмалли ĕçсем тăвасси, культурăпа çут ĕç мероприятийĕсем йĕркелесси.