Тăвайри "Акконд-агро фирма" обществăра сĕт, тăпăрч, кефир, сĕт, хăйма, турăх, пиçнĕ турăх, ряженка тата ытти продукци туса кăлараççĕ.

Анне кунне ĕçри çитĕнỹсемпе кĕтсе илчĕ коллектив. Хăйсен тивĕçĕсене аван пурнăçласа пыракан хĕрарăмсем сахал мар обществăра. Вĕсенчен пĕри - Елизавета Ивановна Федотова кладовщик. Ăна нумаях пулмасть ЧР ял хуçалăх министерствин Хисеп грамоти парса чысларĕç.

Е.Федотова Тăрмăш ялĕнчи вăтам шкул хыççăн Мичуринск хулинчи апат-çимĕç техникумĕнче ятарлă пĕлỹ илнĕ. Дипломлă пулнă хыççăн Канаш хулинче ĕçленĕ пĕр хушă. Унтан Елизавета Ивановна "Акконд-агро фирма" обществăра ырă тĕслĕх кăтартма пуçланă.

"Акконд-агро фирма" предприяти, хупă акционерлă общество пулнă май, туса илекен продукцие хăех ĕçлесе тирпейлесе рынока ăсатать. Сĕчĕ пысăк пахалăхлă аккондçăсен, çавна май сĕт цехĕнче туса кăларакан сĕтпе унăн продукчĕсене те çынсем тулли кăмăлпа туянаççĕ. Маларах асăнтăмăр ĕнтĕ, ассортименчĕ пысăк кунти чиперккесем кăларакан продукцин.

Сăн ỹкерчĕкре: "Акконд-агро фирма" обществăри Е.Федотова кладовщик