Граждан обществин аталанăвĕн фончĕ Раççей регионĕсен ертỹçисен вунпĕрмĕш рейтингне ирттернĕ. Чăваш Ен Пуçлăхĕ Михаил Игнатьев "пысăк рейтинглисен" ушкăнне кĕнĕ, 3 позици çỹлерех хăпарса, 70 баллă кăтартупа Саха Республики (Якутии) Пуçлăхĕпе Егор Борисовпа 34-35-мĕш вырăнсене пайланă.

Атăлçи федераци округĕнчи 14 регион хушшинче Чăваш Ен Пуçлăхĕ 6-мĕш вырăнта (Тутар Республикин Президенчĕ Рустам Минниханов - пĕрремĕш вырăнта).

Кĕпĕрнаттăрсен ĕçĕн эффективлăхне 1-рен пуçласа 100-е çитичченхи балпа хакланă. 75 ытла балл пухнисене "питĕ пысăк рейтинглисен", 75-рен 55 балл таран пухнисене "пысăк рейтинглисен", 55-рен 40 балл таран пухнисене "вăтам рейтинглисен", 40 балран сахалрах пухнисене "вăтамминчен каярах рейтинглисен" ушкăнĕсене кĕртнĕ. Вунпĕрмĕш кăларăмра, чăн та, тăваттăмĕш ушкăнĕ çук.

Регионсен ертỹçисене темиçе критерипе хакланă. Чи малтан вара "общество шухăшĕ" фондăн социологи тĕпчевĕн тата экспертсен хаклавĕн кăтартăвĕсене шута илнĕ.