Иртнĕ шăматкун журналистсем, радиопа телевидени ĕçченĕсем, полиграфистсем, издательсем, пичет ĕçĕн ветеранĕсем Раççей тата Чăваш пичечĕсен кунĕсен ячĕпе Чăваш патшалăх филармонине пухăнчĕç. Хăнасене И.Н.Ульянов ячĕллĕ Чăваш патшалăх университечĕн журналистика факультечĕн студенчĕсем тата ачасен ТВ-Театр студийĕн воспитанникĕсем кĕтсе илчĕç.

Палăртнă вăхăт çитрĕ. Уява Чăваш Ен Пуçлăхĕ Михаил Игнатьев пырса çитрĕ. Савăнăçлă мероприятие кĕске сăмах каласа ЧР информаци политики тата массăллă коммуникацисен министрĕ Александр Иванов уçрĕ. Чи пирваях Михаил Игнатьева сăмах пачĕ. Хăйĕн сăмахĕнче вăл çакна палăртрĕ: "Журналист профессилĕхĕпе яваплăхĕнчен, шалти культурипе йĕркелĕхĕнчен информаци çынсем патне объективлă тата оперативлă çитесси, вĕсен пĕр-пĕр пулăм е уйрăм çын пирки хăйсен шухăшĕ йĕркеленесси килет. Паян эпир рынок экономикин условийĕсенче пурăнатпăр. Эсир вара малалла та çынсене çемье пахалăхĕсем, юрату тата патриотизм çинчен каласа паратăр. Эсир çынсем патне çитерекен информаци вĕсене лару-тăрăва комплекслă хак пама, тивĕçлĕ йышăнусем тума, çĕнĕ идейăсемпе проектсем палăртма май парать", - терĕ Чăваш Ен Пуçлăхĕ. Вăл пичет ĕçченĕсем пирки чылай ăшă сăмах каларĕ, ĕçре ăнăçусем тата аталану сунчĕ, пур шайри влаç органĕсемпе конструктивлă çыхăну тытса ĕçленĕшĕн тав турĕ.

Регионти медиаотраслĕн 2015 çулхи çитĕнĕвĕсем çинчен Александр Иванов министр чарăнса тăчĕ. Ведомство пуçлăхĕ чăвашри массăллă информаци хатĕрĕсем республика тата Раççей шайĕнчи пысăк конкурссенче çĕнтерỹçĕсем пулса тăнине каларĕ.

Савăнăçлă мероприятире творчество тупăшăвĕнче çĕнтернисене дипломсемпе хаклă призсем парса чысларĕç.

Чăваш Республикин Патшалăх Канашĕн депутачĕсем Петр Красновпа Николай Николаев та саламларĕç Раççей тата Чăваш пичечĕн кунĕсемпе, ЧР Патшалăх Канашĕн Хисеп грамотисемпе те наградăларĕç.

Пĕтĕм Раççейри "ТЭФИРегион-2015" конкурс çĕнтерỹçисене Чăваш Ен Правительствин вице-премьерĕ Алла Салаева саламларĕ, вĕсене тав çырăвĕсем пачĕ.

ЧР журналистсен правленийĕн председателĕ Валерий Комиссаров журналистсене Семен Элкер, Леонид Ильин тата Николай Никольский ячĕллĕ премисем тата кăкăр çине çакмалли знаксем парса чысларĕ.

Савăнăçлă мероприятин концерт программи те пуян пулчĕ.

Ф.ПЕТРОВ, ЧР журналисчĕсен Союзĕн членĕ.