"2016 çула Чăваш Енре Ĕç çыннине халалланă. Эпир пурне те тепĕр хут çакна аса илтересшĕн: тỹрĕ кăмăллă ĕç кăна ырă пурнăçăн никĕсĕ пулса тăрать. Çавна май республика кăçал тĕрлĕ отрасльте тăрăшакан чăн-чăн профессионалсене çулталăк тăршшĕпе чыслама палăртать. Çакăн пек тĕлпулăва эпир Правительство çуртĕнче нарăсăн 12-мĕшĕнче пĕрремĕш хут сирĕнпе _ малта пыракан доярсемпе, машинăпа сăвакан чи лайăх операторсемпе ирттеретпĕр, мĕншĕн тесен хресченсен ĕçĕ мĕн ĕмĕртен чи пĕлтерĕшлисен шутĕнче пулнă: шăпах эсир - çĕр ĕçченĕсем, выльăх-чĕрлĕх ĕрчетекенсем кашни çын сĕтелĕ çинче куллен аш-какайпа сĕт, çăкăрпа çĕрулми пултăр тесе тăрăшатăр, шуçăмпах ĕçе васкатăр, канмалли кунсемсĕр вăй хуратăр _ çакăншăн сирĕн умра пуç таятпăр", - тенĕ машинăпа сăвакан операторсене ĕçри çитĕнỹсемшĕн патшалăх наградисемпе тата ЧР Пуçлăхĕн Тав хучĕсемпе чысланă май Михаил Игнатьев.

Тĕлпулăва машинăпа сăвакан 30 оператора тата зоотехниксемпе ветеринарсене йыхравланă.

Республика Пуçлăхĕ патшалăх пулăшнине пула тата аграрисен тỹрĕ кăмăллă хастар ĕçĕпе Чăваш Енре ял хуçалăх отраслĕн кăтартăвĕсем çулран-çул лайăхланса пынине палăртнă. Пĕлтĕр, сăмахран, хуçалăхсен мĕнпур категорине шута илсе, ял хуçалăх продукчĕсем туса илнин индексĕ 107,9 процентпа танлашнă. "АПК аталанăвĕ" приоритетлă наци проектне пурнăçа кĕртме тытăннăранпа республикăра кашни ĕнерен сĕт суса илесси 36 процент, пĕлтĕр вара 4,5 процент ỹснĕ. Фермăсем те унчченхи мар - вĕсем халĕ çĕнетнĕ, ку чухнехи оборудованипе тата автоматизаципе, лайăх технологипе пуянлатнă производство çурчĕсем. Вĕсенчен тупăш илесси те унчченхинчен чылай пысăк тата вăл ỹссех пырать.

Пысăк наградăна илнисем хушшинче Етĕрне районĕнчи "Ленинская Искра" хуçалăхри ЧР ял хуçалăхĕн тава тивĕçлĕ ĕçченĕ ятне илнĕ Зоя Филиппова та пулнă. Вăл 2015 çулта хăйне çирĕплетсе панă кашни ĕнерен вăтамран 8193-шер килограмм сĕт суса илнĕ. Ыттисен те кăтартăвĕсем пысăк.

Пирĕн районтан асăннă тĕлпулăва "Акконд-агро фирма" хупă акционерлă обществăри Полина Васильевна Семина тата Кармалти хресчен фермер хуçалăхĕнчи Марина Евдокимовна Никитина машинăпа ĕне сăвакан хастар операторсем хутшăннă. Вĕсемпе пĕрле райадминистрацин АПК аталанăвĕпе экологи пайĕн тĕп специалист-эксперчĕ Елена Александровна Михайлова та пулнă. Выльăх-чĕрлĕх ĕрчетес ĕçре нумай çул хушши тỹрĕ кăмăлпа ĕçленĕшĕн тата производствăри çитĕнỹсемшĕн Полина Семина ЧР Пуçлăхĕн Тав хутне тивĕçнĕ.

Михаил Игнатьев тĕлпулăва хутшăннисен хастарлăхĕпе çитĕнĕвĕсем асăннă отрасле малашне те аталану çулĕпе çирĕппĕн пыма хавхалантарассине шанса тăнине пĕлтернĕ.

И.ГЛАДКОВ.

Сăн ỹкерчĕкре: пирĕн районтан кайнисем Чăваш Ен Пуçлăхĕпе Михаил Игнатьевпа тата ял хуçалăх министрĕпе Сергей Артамоновпа пĕрле.