Чăваш Республикин Пуçлăхĕ Михаил Игнатьев апрелĕн 4-мĕшĕнче республика Правительствин членĕсемпе, федерацин территорири влаç органĕсен тата хула округĕсен ертỹçисемпе эрнесеренхи канашлу ирттернĕ.

СУЙЛАВА ХАТĔРЛЕНСЕ

Регион Пуçлăхĕ çав кун çитес суйлавсем пирки Указа алă пусни çинчен пĕлтернĕ. Асăннă документ Чăваш Ен территорийĕнчи суйлав комиссийĕсене 2016 çулхи сентябрĕн 18-мĕшĕнче Раççей Федерацийĕн Федераци Пухăвĕн Патшалăх Думин çиччĕмĕш созыври депутачĕсен тата Чăваш Республикин Патшалăх Канашĕн улттăмĕш созыври депутачĕсен тата вырăнти хăйтытăмлăх органĕсен хушма суйлавĕсене ирттерме пулăшассипе çыхăннă, пурнăçа кĕртмелли мероприятисене кăтартса панă.

Чăваш Республикин Тĕп суйлав комиссийĕн председателĕ Александр Цветков палăртнă тăрăх, асăннă Указ пысăк пĕлтерĕшлĕ документ пулса тăрать, унта суйлавсене хатĕрленсе ирттерессипе пур йĕркелỹ самантне те туллин кăтартнă.

34 ТĔРЛĔ СОЦИАЛЛĂ ПУЛĂШУ

Чăваш Ен Пуçлăхĕ Михаил Игнатьев республика Правительстви Чăваш Енре пурăнакансем умĕнчи мĕнпур социаллă обязательствăна пурнăçлани тата малашне те туллин пурнăçласа пырасси çинчен пĕрмаях аса илтерсе тăрать. Çак вăхăта республикăра пурăнакан 346,4 пин çын 34 енпе тĕрлĕрен социаллă тỹлев илсе тăрать. Çак шутран 309,3 пин çын пурăнмалли çурт-йĕрпе коммуналлă хуçалăх услугисемшĕн тỹлеме патшалăх пулăшăвĕпе усă курать. Кăçалхи январь-март уйăхĕсенче кăна çав тĕллевпе 431,9 млн. тенкĕ уйăрнă. Сăмах майăн асăнсан, пирĕн Тăвай районĕнче 6073 çын 18,2 млн. тенкĕ социаллă пулăшу илнĕ.

Республика финанс министрĕ Светлана Енилина пĕлтернĕ тăрăх, социаллă политика обязательствисене пурнăçлама республика бюджетĕнче пĕтĕмĕшле 11 млрд. тенкĕ пăхса хунă, вăл шутран 9,8 млрд. тенкине тĕрлĕ социаллă пулăшу мелĕсем валли уйăраççĕ. Çавна май 2015 çулта Тăвай районĕнче социаллă политика ыйтăвĕсемпе 83,4 млн. тенкĕ тăкакланă, кăçал та унран кая мар пулассине пĕлтерчĕ райадминистрацин халăха социаллă хỹтлĕх паракан пай заведующийĕ Л.П.Аввакумова.

Кăçалхи апрелĕн 1-мĕшĕ тĕлне республикăра 219,8 пин ĕçпе вăрçă ветеранĕ пурăнать. Вăл шутран Чăваш Республикин ĕç ветеранĕсем 46,7 пин çын. Çак хисеплĕ ята вĕсем Чăваш Республикин Пуçлăхĕн Михаил Игнатьевăн йышăнăвĕпе тивĕçнĕ. Кăçалхи пĕрремĕш кварталта ку ята хальлĕхе илнисем 1857 çын.

Тăвай районĕнче "Ĕç ветеранĕ" ята тивĕçнисем пурĕ 1706 çын. Кăçал "Ĕç ветеранĕ" ята хальлĕхе 23 çын илнĕ.

Пурин те вĕсен тивĕçлĕ çăмăллăх илме право пур.

Паянхи куна республикипе мĕнпур ветерансенчен 15 проценчĕ (Тăвай районĕнче 3,4 проценчĕ) ĕçленине пула ĕç ветеранне паракан çăмăллăхпа усă кураймасть. Ĕçлеме пăрахнă хыççăн вара вĕсен пурин те уйăхсерен паракан тивĕçлĕ укçа пособине илсе тăма тытăнма право пур.

ТИРПЕЙ_ИЛЕМ ХАМĂРШĂН

Чăваш Республикин çут çанталăк ресурсĕсен тата экологи министрĕ Сергей Павлов муниципалитет районĕсемпе хула округĕсен территорийĕсене тасатса тирпейлессипе экологи уйăхлăхĕ ирттерессин ыйтăвĕсене хускатнă. Раççейре апрелĕн 15-мĕшĕнчен тытăнса июнĕн 5-мĕшĕччен "Экологи хăрушсăрлăхĕн кунĕсем" пулаççĕ. Унпа çыхăннă мероприятисене республикăра та чылай ирттерме палăртнă.

Тăвай районĕнче апрелĕн 1-30-мĕшĕсенче экологи уйăхлăхĕ ирттереççĕ. "Çурхи ырăлăх эрни", "Йывăç ларт тата ăна упраса ỹстер" акцисем пурте тавралăх чĕрĕлĕхĕшĕн, тасалăхпа тирпей-илемшĕн.

ХАКСЕМ ПИРКИ

2016 çулхи январь-март уйăхĕсенче потребитель таварĕсен хакĕсем улшăннă пирки экономика аталанăвĕн, промышленноç тата суту-илỹ министрĕ Владимир Аврелькин пĕлтернĕ. Кăçалхи март уйăхĕнче, иртнĕ çулхи декабрьпе танлаштарсан, инфляци 1,9 процент пулнă. Ку вăл Раççейри вăтам кăтартуран 0,2 процент пĕчĕкрех. Март уйăхĕнче ĕне выльăх тата сысна ашĕ, чăх-чĕп, тăпăрчă, чăх çăмарти, çăкăр-булка, çĕр улми, чĕрĕ хăярпа помидор хакĕсем чакнă.