Чăваш Республикин Наци библиотекинче Пĕтĕм Раççейри çамрăк вулакансен "Живая классика-2016" конкурсăн регионти тапхăрĕ иртнĕ. 60 ытла вĕренекен вырăс тата ют çĕршыв çыравçисен прозăлла произведенийĕсенчи сыпăкĕсене пăхмасăр калассипе тупăшнă. Жюри членĕсем вулавçăсен пултарулăхне 4 енлĕ хакланă: суйласа илнĕ произведени, йăнăшсăр тата артист пек выляса, каласа кăтартасси, темăна уçса пама пĕлни.

Конкурсантсене 3 ỹсĕмрен - 5-6, 7-8, 9-10 классенче вĕренекенсенчен - суйласа илнĕ. Ăна йĕркелекенсен тĕп тĕллевĕ -ачасемпе çамрăксен хушшинче художество пултарулăхне, вулас туртăма анлă сарса пропагандăласси.

Республикăра район чысне Енĕш Нăрваш шкулĕнче 6 класра вĕренекенсем А.Лазаревапа А.Шутова (учителĕ Н.П.Майраслова) хỹтĕленĕ. А.Лазарева регионти тапхăрта И.Пивоварован "О чем думает моя голова?" калава вуласа малтисен шутне кĕнĕ. Чингиз Айтматовăн "Материнское поле" повеçĕнчи Алиман монологне А.Шутова та пысăк туйăмпа каласа панă. Конкурса хутшăнакансене кĕнекесем парса хавхалантарнă.

И.ПЕТРОВА.