Етĕрнери культура çуртĕнче СССР халăх артисчĕ Н.Д.Мордвинов ячĕллĕ регионсем хушшинчи театр фестивалĕ иртнĕ.

Енĕш Нăрвашри халăх театрĕ Николай Айзманăн "Шикли шикленнĕ - кĕрĕк пĕркеннĕ" камитне кăтартнă. Рольсене театр режиссерĕ З.Васильева (Фрося), В.Ефимов (Тит Нилч), Галина Русская (шăл тухтăрĕ) вылянă, жюри вĕсен ĕçне чи пысăк хак панă. Куракансем те тăвăллăн алă çупса хапăллăн йышăннă артистсене. Нăрвашсем регионсем хушшинчи фестивальтен çĕнтерỹпе таврăннă, I степеньлĕ лауреат дипломне çĕнсе илнĕ.

Çавăн чухнех халăх театрĕ республика шайĕнче иртнĕ "Тамаша" фестивалĕн дипломанчĕ те пулса тăнă. Творчество коллективĕ Изамбаево ялĕнчи культура çуртĕнче театра юратакансене тĕрлĕ постановкăсенчи сыпăксене (сăн ỹкерчĕкре) выляса савăнтарнă. Юлашкинчен ял халăхĕпе юрланă, ташланă. Етĕрнесем тăвайсен ĕçĕ-хĕлĕпе интересленнĕ. 2017 çулта Енĕш Нăрвашри халăх театрĕн 30 çулхи юбилейĕ пулнă май, театр хастарĕсенчен пĕри Мая Арестова унăн историйĕпе паллаштарнă, пултаруллисен ячĕсене асăнса хăварнă. Унăн мăшăрĕ Юрий Палладиевич маттуррисенчен пĕри пулнине кăтартса панă, Николай Сидоровăн "Виçĕ хĕре пĕр каччă" спектакльти пĕр сыпăка (Çỹппи Ваçильч ролĕпе) ăста выляса куракансене тыткăнланă.

Фестиваль çĕнтерỹçи октябрь вĕçĕнче Киров хулинче иртнĕ Пĕтĕм Раççейри "Чĕрĕ сăмах" конкурса хутшăннă. Ялти сцена ăстисем "Эпир чăвашсем, чăвашах пуласшăн" театрализациленĕ музыка композицийĕ хатĕрленĕ.

Р.ШУМОВА.