Алена Иванова ялти культура çуртĕнче тирпей-илем кĕртессишĕн тимлет. "Тăрмăш" халăх фольклор ушкăнне йĕркеленĕренпех унта çỹрет.

Икĕ хĕрне тивĕçлĕ воспитани парса пĕчченех пăхса ỹстерчĕ. Мăшăрĕ Алексей Алексеевич чире пула ытла ир пурнăçран уйрăлчĕ. Хĕр пĕрчийĕсем Тăрмăшри вăтам шкултан лайăх паллăсемпе вĕренсе тухрĕç. Асли, Оксана, диплом илнĕ хыççăн Мускава ĕçе вырнаçрĕ. Таможня системинче тăрăшать. Тĕп хуларах пулас мăшăрĕпе тĕл пулнă, ав. Тепĕр уйăхра çамрăксем мăшăрланасшăн. Чăн-чăн чăваш туйĕ те кĕрлеттересшĕн ялта. Фольклор ушкăнĕн членĕсем унта хутшăнма хатĕрленеççĕ.

Кĕçĕнни, Оля, тĕп хулара вĕренет-ха. Вăл та аппăшĕ пекех ялти художество пултарулăх ĕçне хастар хутшăнать. Канмаллине яла килсен е пушă вăхăт тупăнсанах амăшĕпе пĕрле культура çуртне васкать. Çапла çемйипех юратаççĕ юрлама, ташлама.

Е.МАТРОСОВА,

"Тăрмăш" фольклор ушкăнĕн ертỹçи