Мĕн авалтан почта общество пурнăçĕнче уйрăм вырăн йышăннă: тĕрлĕ хулара, ялта е çĕршывра пурăнакансене пĕрлештернĕ, чĕрене ăшăтакан çыру çитернĕ, бандерольпе е посылкăпа кĕтмен асамлăх парнеленĕ. Паянхи кун та почтальонсем ял çыннисемшĕн яланах кĕтнĕ çынсем. Вĕсем халăха хаçат-журналпа, пенсипе кăна мар, тĕрлĕ таварпа та тивĕçтереççĕ.

Тăвайри почта уйрăмĕн ĕçченĕсене тав сăмахĕ калас килет. Вĕсен тăрăшулăхне пулах "Ял ĕçченĕ" хаçата кăçалхи пĕрремĕш çур çулта илсе тăма пĕлтĕрхи ку вăхăтринчен пĕр экземпляр та чакарман. Çырăнтару тапхăрĕнче ку енĕпе лайăх ĕçлекенсем (сăн ỹкерчĕкре) сулахайран сылтăмалла, пĕрремĕш ретре: Ираида Евдокимова, Элина Виноградова, Раиса Викторова. Иккĕмĕш ретре: Оксана Петрова, Оля Никитина, Зоя Васильева почтальонкăсем.

Е.ШИБАЛОВ сăн ỹкерчĕкĕ