Енĕш Нăрвашри пĕтĕмĕшле вăтам пĕлỹ паракан шкулта ялти спорт ветеранĕпе Владимир Петровпа ăшă тĕлпулу иртрĕ.

Чи малтанах В.Петровăн спортри çитĕнĕвĕсемпе паллашрăмăр. Вăл тĕрлĕ спорт ăмăртăвĕсенче район чемпионĕ пулнă. Физкультура учителĕ тата военрук пулса ĕçленĕ тапхăрта унăн вĕренекенĕсем районти тата республикăри тупăшусенче çитĕнỹсем тунă. Каярахпа спорт мастерĕсемпе кандидачĕсем, çар тата право хуралĕн офицерĕсем пулса тăнă. Вĕсен шутĕнче - Е.Григорьева, В.Алексеев, В.Егоров, И.Дмитриев, Г.Сергеев, А.Егоров, В.Владимиров тата ыттисем те.

Владимир Васильевич шкулта вĕреннĕ чухне футболла вылянисене, йĕлтĕрпе чупнисене, Канашри педучилищĕре физкультура уйрăмĕнче вĕреннĕ тапхăрсене ăшă кăмăлпа аса илчĕ. Калаçу вăхăтĕнче салтак тивĕçне Германири çар ушкăнĕнче пурнăçланă тапхăра куç умне кăларчĕ.

6 çухрăма чупса икĕ хутчен полк чемпионĕ пулни, 300 метра чупса дивизи ăмăртăвĕсенче 3-мĕш вырăн йышăнни тата нумай енлĕ кĕрешỹре спортăн пĕрремĕш разрядне пурнăçлани çинчен каласа панисем тыткăнларĕç ачасене. Спорт ветеранĕ республикăри ăмăртусенче йĕлтĕрпе чупни, биатлон тата ориентировка енĕпе тупăшнă вăхăтĕнче сиксе тухнă, асра юлнă хăш-пĕр самантсем çинче те чарăнса тăчĕ. Халĕ В.Петров музейра ĕçленĕ май, вырăнти спортсменсен стендне хатĕрленĕ, сăн ỹкерчĕкĕсемпе тĕрлĕ хисеп хучĕсен пуххине папкăсене пуçтарнă. Тĕлпулу вăхăтĕнче хăш-пĕр спортсменсен наградисене шкул ачисене кăтартрĕ. Юлашкинчен çамрăксене физкультурăпа спорта юратма, тĕрлĕ ăмăртусене активлă хутшăнма тата вĕсенче ăнăçусем сунчĕ. Тен, çак тĕлпулу хыççăн хăш-пĕр ачасен физкультурăпа спорт енне туртăну çĕнĕ вăй илĕ.

В.ВЛАДИМИРОВ,

Енĕш Нăрваш шкулĕнчи физкультура учителĕ.